E mihi ana ki ngā mate huhua, tuatini kua huri tuara mai nei rātou ki a tātou, haere koutou ngā mate, haere, haere mai, haere. He rāngai mamao kua taka ki tua o Nukutaurua e kore ā muri e hōkia, ko koutou ēna kua riro atu i te ringa kaha o Aituā moe mai, moe mai, kāti mo rātou.
Tuia te rangi e tū nei, tuia te papa e takoto nei, tuia te muka tangata e rangitāmirohia nei, e whiria nei i roto i tō tātou whare, Te Whare Tapu o Ngapuhi Ko te reo me ona tikanga te maiaorere i tuituia, i tānikotia e ō tātou tūpuna hei tāwharautanga mō ngā whakatupuranga o mohoa noa nei, o haere ake nei kia mahana tonu ai tātou i roto i te ao hurihuri.
Nō reira, kei ngā tāngata e ngākau nui ana, e hikaka ana ki nga mahi taiaha, rākau, patu, taikaha wēnā momo mahi katoa, nau mai, haere mai.